أثار الفنان علي الطيب الجدل خلال الساعات الماضية بسبب خلافه مع صناع مسلسل «عمر أفندي» لاستعانتهم بجملته الشهيرة «حاجة 13 خالص» ضمن أحداث العمل.
بداية الخلاف
وكانت بداية الخلاف مع استعانت أبطال مسلسل «عمر أفندي» بجملة «حاجة 13 خالص» التي اتشهر بها الفنان علي الطيب بدوره «وديع البساطي» في مسلسل «أهو ده اللي صار» من بطولة روبي وأحمد داود ومحمد فراج والذي تم عرضه عام 2019.
ومع إعادة أبطال مسلسل «عمر أفندي» لاستخدام الجملة ضمن أحداث المسلسل أكثر من مرة وتصدرها للتريند هاجم الفنان علي الطيب صناع العمل عبر صفحته الشخصية على فيسبوك وذلك بعد أن أنتهى عرض العمل.
هجوم علي الطيب
ووجه علي الطيب رسالة إلى صناع المسلسل قائلا :«حابب أبارك لكل زمايلي في عمر أفندي على نجاحهم بجملة وديع البساطي المشهورة دي حاجة 13 خالص» وتابع قائلا :«واستنوا على الجزء الثاني لغاية ما أفكرلكم في الجديد منه عشان تعرفوا تقلدوه».
واختتم هجومه قائلا :«تحياتي للي نجحوا بمصطلحاتي.. وطول عمرها اللعبة ليها أصول وبنتعلم من بعض مش بنعلم على بعض».
التراجع عن الهجوم
ورغم الهجوم الذي شنه علي الطيب على صناع مسلسل «عمر أفندي» إلا أنهم التزموا الصمت ليحذف بعدها بأيام قليلة بوست الهجوم موضحا أسبابه قائلا :«تم حذف البوست والأسباب هي: أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في أي برنامج أو أي لقاء أنهم اقتبسوها من وديع البساطي في مسلسل أهو ده اللي صار».
كواليس جملة «حاجة 13 خالص»
وتابع قائلا :«المصطلح موجود في مصر زمان فعلا مش أنا اللي اخترعتها بس بيبقى كل ممثل بيبذل مجهود من أجل الشخصية تبقى لحم ودم مش كلام على ورق فقط وبيقول كلامه وخلاص وده كان جزء من مجهودي اللي تم أثناء تحضير الشخصية في المسلسل وبعد ما عرضت بعض المصطلحات على الأستاذ السيناريست عبد الرحيم كمال والأستاذ حاتم علي عليه رحمة الله».
واستكمل علي الطيب حديثه قائلا :«اخترنا اللي يتناسب مع الشخصية التي تعبر عن شخصيته واتوظف في الحوار بشكل مناسب ومنطقي للمشاهد من الأستاذ عبد الرحيم واتعرض المسلسل وربنا كتب لنا القبول في قلوبكم ونجح المسلسل واتشهرت شخصية وديع البساطي بمصطلحاتها اللي تعتبر كانت جديدة على الجمهور رغم أن الجملة ليها أصل ومعنى ووضحناه في المسلسل».
أسباب الهجوم
وأشار علي الطيب إلى أن سبب هجومه هو تجاهل أسرة مسلسل «عمر أفندي» لمجهوده قائلا :«أظن احنا في مهنة واحدة يعني عارفين شغل بعض ونعرف بعض كويس وبينا كل خير لا يمكن يجيلي عمل فني أو اسكريبت واكتشف أن في جملة أو مصطلح مشهور لزميل ليه ونجح بيه وأكرره أو اتجاهل مجهوده هو وصناع العمل واحترم نجاحه».
وأضاف:«حق كل فنان يغير ويبقى نفسه يعمل شخصية حلوة ويستمتع بأدائها المشاهد وده حق شرعي بس أظن أن التميز هنا هيكون في الاختلاف والاجتهاد المطلوب منك وليس الاستسهال ولنفرض حصل وقولت مصطلح يخص شخصية فنيه لعبها زميل ومتفرجتش عليه أو مافيش حد نبهني».
تابع:« يبقى أقل واجب بعد عرض المسلسل وعرفت المعلومة يبقى أقل حق سواء كتاب العمل أو أنا كفنان أوضح في أي لقاء في أي برنامج أنه تم الاقتباس من العمل الفني اللي قبلنا ووقتها مش هيكون ليه حق ازعل وأفهمها تجاهل من زمايلي لأني غصب عني مفهمتهاش غير كده».
نهاية الخلاف
وأنهى علي الطيب كشفه عن تفاصيل خلافه مع صناع المسلسل قائلا :«اللي يعرفني كويس عارف إني دايما مبتأخرش عن زمايلي وبفرح لنجاحهم من قلبي ولا عمري نفسنت ولا اتكلمت في تفاصيل شبه دي بس الموضوع لو مكنش يخصني كنت هقول كلمة حق في حق الزميل اللي سبق ونجح بشخصية وبمصطلحاتها اللي علمت مع الجمهور بفضل ربنا».
واختتم حديثه قائلا :«احنا اللي بينا كل خير وصحاب واخواتي وعلى راسي وربنا يعلم أنهم غاليين عندي بس حسيت أني مش شرط يكون زعلي من تجاهلهم يفرق معاهم.. فا محبتش اسيب الموضوع يكبر وتاخد اتجاه مش لطيف وطلبت من الشباب المسؤولين عن الصفحة تحذف البوست لأن العتاب والهزار هيقلب جد لحد ما اكتب بوست أوضح فيه وربنا ما يجيب زعل ولا مشاكل.. وعلى رأي البساطي الفنان أناني ومش عيب».
